Máis de dous centenares de regatistas reuniranse, a partir deste venres 27 de xuño no Centro Galego de Vela, para disputar a Copa Xunta de Galicia – Semana Galega de Vela, proba que organiza a Real Federación Galega de Vela e que marca o inicio da tempada de verán para as clases de vela lixeira.
“A Semana Galega da Vela, sen dúbida, está moi instaurada como o evento de inicio de verán para toda a vela lixeira de galicia, e a verdade é que sempre temos moito volume. Cremos que este ano será de novo un éxito”, afirmou Bruno Gago, director técnico federativo, engadindo que “á xente gústalle moito a proba e é unha gran ocasión para xuntarse e compartir experiencia, os máis pequenos cos maiores, ademais de poder ver moito clases distintas navegando á vez”.
Ao longo das tres xornadas que durará a competición, a cita irá tomando forma de maneira graduada para as nove clases convocadas. As frotas de Optimist, 420 e ILCA 4 serán as encargadas de inaugurar mañá os marcadores coas primeiras probas do seu programa a partir das 15.00 horas, e o sábado, pola súa banda, farano as outras seis clases restantes: ILCA 6, Vaurien, Raceboard, Techno 293, Radio Control e Wingfoil, que se estrea por primeira vez na competición arousá.
Do mesmo xeito que en anos anteriores, o formato de competición estará dividido en dúas fases: unha primeira fase clasificatoria —con oito probas programadas para Optimist, ILCA 4 e 420, e seis para o resto de clases— e unha definitiva Medal Race de dobre puntuación, que se disputará o domingo nas inmediacións do Centro Galego de Vela e será a encargada de definir o podio da Copa Xunta de Galicia – Semana Galega da Vela.
A cita finalizará coa entrega de trofeos aos vencedores, programada para o domingo ás seis da tarde. Como Copa Xunta de Galicia, durante o acto entregarase tamén o galardón ao mellor club clasificado e aos mellores regatistas, masculino e feminino, de entre os máis de 200 participantes.
Charlas formativas
É a gran novidade xa anunciada desta edición. Neste 2025, a RFGV puxo en marcha un ciclo de charlas formativas para os federados, co fin de actualizar os coñecementos técnicos dos asistentes, compartir experiencias e promover o desenvolvemento deportivo.
Das sete programadas, a última coincidirá coa celebración da competición. Será este sábado, no Centro Galego de Vela, tras a disputa das regatas, e contará cos irmáns Martín e Jaime Wizner como protagonistas. Ambos compartirán as súas vivencias e a súa experiencia no último Europeo de 49er, no que se proclamaron campións absolutos da clase.
