A partir deste martes, 1 de xullo, Galicia asume oficialmente as competencias sobre a xestión do litoral, nun paso cualificado como “histórico” polo presidente da Xunta, Alfonso Rueda, pola súa relevancia no reforzo do autogoberno galego. A medida supoñerá que a comunidade autónoma xestione directamente o dominio público marítimo-terrestre, ata o de agora en mans do Estado.
Para facilitar esta transición, a Xunta implantará un trámite único que centralizará todos os procedementos relacionados con usos e ocupacións do litoral, e poñerá en marcha dúas novas canles de atención cidadá: unha páxina web específica e unha liña directa a través do teléfono 012, onde particulares e empresas poderán consultar calquera dúbida ou xestionar permisos.
Durante a comparecencia posterior ao Consello de la Xunta celebrado este luns, Rueda detallou tamén os próximos pasos en materia de política costeira, destacando unha aposta pola sustentabilidade e a integración paisaxística.
Entre as iniciativas anunciadas atópase a convocatoria dun concurso de ideas* dirixido a estudos de arquitectura e profesionais independentes para deseñar un prototipo de ‘chiringuito’ desmontable e biosostenible, adaptado ás paisaxes naturais de Galicia. O obxectivo é contar en 2025 cun proxecto básico que sirva como referencia para os negocios interesados, acompañado dunha guía de integración paisaxística.
Ademais, a Xunta avanza na elaboración dun catálogo de bens costeiros de valor cultural, que entrará este martes en fase de consulta pública. A iso súmase o deseño dun gran roteiro litoral que percorrerá a costa galega desde Ribadeo ata Tui, dentro dunha rede de senllas naturais impulsada polo Goberno galego.
Outra liña de traballo contempla a regulación dunha rede de aloxamentos turísticos que aproveite edificacións xa existentes na franxa costeira, permitindo un desenvolvemento económico respectuoso coa contorna.
Apoio ao sector pesqueiro e control sanitario
No ámbito pesqueiro, o Executivo galego destinará 400.000 euros en 2025 a unha nova orde de axudas para a creación e consolidación de Organizacións de Produtores Pesqueiros (OPP) e as súas asociacións, con financiamento europeo.
Así mesmo, as consellerías de Sanidade e Mar renovarán un convenio por valor de 120.000 euros para realizar controis nas augas onde se cultivan moluscos bivalvos, garantindo así a seguridade alimentaria mediante a análise de contaminantes.
Con estas medidas, Galicia inicia unha nova etapa na xestión da súa costa, combinando autonomía, sustentabilidade, desenvolvemento turístico e protección do patrimonio natural e cultural.
