A Plataforma en Defensa da Sanidade Pública no Barbanza vaise reunir novamente este xoves ao mediodía, a partir das 12.00, diante do Centro de Saúde de Ribeira para reclamar novamente a cobertura do cen por cen das prazas do persoal do Centro en Ribeira. O programa da mobilización inclúe a lectura de manifestos en defensa dun sistema sanitario público, universal e de calidade, que porán o foco na precariedade do servizo sanitario na comarca do Barbanza, que, segundo denuncian dende a plataforma, levan anos sufrindo falta de medios e persoal e precisan medidas urxentes da Consellería de Sanidade para emendar unha situación, de por si crítica, que se agravará as semanas vindeiras coa chegada da poboación turista.
Entre as principais queixas figuran a falta de médicos de familia, o colapso nas citas de atención primaria, a redución de servizos no hospital comarcal e a precariedade laboral do persoal sanitario. Os manifestantes tamén esixiron máis recursos para a atención á saúde mental e unha maior cobertura nos centros periféricos.
