Este sábado 7 de xuño Sonora Asociación Cultural, en colaboración co Concello de Porto do Son, vai organizar a feira Creasón, a Festa da Arte e da Cultura de Porto do Son. Trátase, sinalan dende a organización, “dun espazo creativo no que, ademais de amosar a artesanía local, contarase con música en directo, obradoiros para persoas adultas, sesións vermú e de contacontos e moitas máis sorpresas”. A feira desenvolverase na praza Rosalía de Castro.
O programa de actividades arrincará ás 10.30 horas coa apertura da mostra de artesanía e proseguirá ás 12.00 co obradoiro de máscaras cerámicas e ás 12.30 horas co espectáculo A roxiña de Carballosa e o cego de Aradiza. Logo será a quenda da sesión vermú con Thais Suki. Pola tarde, despois do xantar, a feira de artesanía volverá abrir as portas a partir das 16.00 horas. Farao cun obradoiro de iniciación ao toque con culleres e, a continuación, cun taller de pendentes de mar e outro sobre regueira. Ás 18.30 horas haberá un contacontos con Nuska Chousa. O peche da mostra está previsto ás 20.00 horas. Un cuarto de hora máis tarde celebraranse os sorteos e máis a entrega de premios. A parte musical, a partir das 19.30 horas, virá da man de Ebora e BMT Suevia.
As persoas do territorio de Porto do Son adicadas á artesanía e á creación interesadas en participar na mostra poden poñerse en contacto coa organización a través das súas redes sociais.
