Boiro prepárase para vivir unha das súas citas comerciais máis esperadas: a Noite Aberta 2025, organizada pola Asociación Boirense de Empresas (ABE), prevista para este sábado 7 de xuño. A xornada reunirá a máis de 30 negocios locais, que ofrecerán descontos especiais durante todo o día, cun horario ampliado ata as 22:00 h e estarán sinalizados cunha bandeira rosa.
Durante toda a xornada, as persoas que merquen no comercio local poderán gozar dunha ampla programación de actividades, animación musical, obradoiros e agasallos directos, nun ambiente pensado para todos os públicos.
A presentación oficial da campaña, celebrada este mércores 4 de xuño, contou coa participación do presidente da ABE, Daniel García, e dos concelleiros de comercio e cultura que destacaron “a importancia de apoiar ao pequeno comercio e de fomentar espazos de encontro que dinamicen as rúas da vila”.
Segundo explicou García, “un dos grandes atractivos desta edición será a ruleta de premios, situada na rúa Santos Mieites, que ofrecerá agasallos directos como botellas reutilizábeis, estoxos, palas de praia, crema solar, cordóns para o móbil e moito máis”. Cada persoa poderá facer unha tirada por cada compra superior a 10 euros realizada nos establecementos participantes.
Ademais, os comercios entregarán convites exclusivos para gozar doutras actividades como o tren infantil, a haima con brochetas de lambonadas ou a haima con flocos de millo, ambas con música incluída. Estes espazos estarán repartidos entre a praza do Concello e a rúa Borobó, “ofrecendo unha experiencia completa de lecer familiar en diferentes rúas da vila”, explicou García.
Personaxes disney e photocall para a rapazada
A partir das 17:00 h, a rapazada poderá atoparse coas personaxes Mickey e Minnie, que percorrerán os negocios participantes repartindo lambonadas e globos entre os máis pequenos. Entre as 19:00 e as 20:00 h, tamén se poderán sacar fotografías coas personaxes nun photocall decorado, situado ao carón da ruleta de premios gratuitamente e sen necesidade de convite previo.
Tradición, creatividade e inclusión
A xornada incluirá tamén unha nova edición de Labores na rúa, coas ganchilleiras de San Ramón, que tecerán en directo na rúa Santos Mieites. Tamén haberá obradoiros infantís de chaveiros e pulseiras, e un obradoiro de reciclaxe con CDs aberto a todo o público.
A organización contará coa colaboración da entidade BarbanTEA, que instalará un posto informativo de 18:00 a 21:00 h, reforzando así o enfoque inclusivo e social do evento.
Música para rematar a festa
A xornada culminará cunha sesión de animación musical familiar itinerante a cargo do Gran Cuarteto da Familia Bocaprier, que percorrerá as rúas con música e humor entre as 20:30 e as 22:00 h, poñendo o broche de ouro a unha Noite Aberta “pensada para vivir, mercar e divertirse en Boiro”. Esta é unha actividade organizada polo Concello de Boiro.
“Esta será, sen dúbida, a mellor Noite Aberta celebrada ata a data, cunha programación ampla, participativa e pensada para gozar en familia, mercando no comercio local”, engadiu Daniel García, lembrando que toda a información actualizada está dispoñíbel en www.abe.gal.
Esta campaña está co-financiada pola Xunta de Galicia e conta coa colaboración do Concello de Boiro.
