Outra gran xornada de competición en Vilagarcía. A Copa Xunta de Galicia – Semana Galega da Vela, proba que organiza a Real Federación Galega de Vela, disputou este sábado 28 a súa segunda xornada con máis de 200 regatistas pelexando pola tradicional cita arousá.
Á primeira hora da mañá, o comité de regatas tratou de aproveitar a brisa do norte para comezar as probas de Optimist, ILCA 4 e 420, pero sen éxito. Finalmente, pasadas xa as doce do mediodía e cunhas condicións moi similares ás da primeira xornada, a frota escoitou o primeiro sinal de saída dunha xornada que se alongaría ata pasadas as 18.00 horas.
En clase Optimist, con dúas probas máis na marcadora, Guillermo García do RCN Vigo continúa comandando a xeneral por diante de Hugo Iglesias, do RCN Rodeira, que é segundo, e de Rosa Rivero, do RCN Coruña, que ocupa a terceira praza e mantense como primeira muller da xeneral. Na división Sub13, Carla Teijeiro do RCN Sanxenxo continúa tamén como mellor clasificada na décimo quinta posición.
En ILCA 4 tampouco houbo cambios no máis alto do podio provisional e Alejandro Pérez, do RCN Vigo, segue primeiro con pleno de vitorias. Séguenlle en segunda e terceira posición, respectivamente, Ana Costas do RCN Rodeira –primeira en mulleres– e Lucía Díaz do CN Marina Coruña.
En clase 420, Luís Wizner e Celia de la Fuente, do RCN Vigo, que non competiron na xornada inaugural, anotáronse as tres vitorias parciais postas en xogo este sábado e colócanse como novos líderes da táboa. A segunda posición ocúpana agora Fernando Campos e Pablo Barreiros, dos clubs RCN Vigo e Sanxenxo, e terceiros son Fernando González del Castillo e Martín Seoane, do RCN Coruña.
En ILCA 6, a frota estreouse este sábado en competición con Martín Mijares, do CN Marina Coruña liderando cun punto de vantaxe sobre Bruno Iglesias, do CND Ribeira. Completa o podio Miguel Rey, do RCN Vigo, no terceiro caixón provisional.
Outro dos líderes que non deu opción aos seus rivais foi Jorge Maciel, do CV Playa de Oza, na clase Raceboard. Con tres primeiros postos anotados, Maciel lidera por diante do seu fillo Martín, que é segundo, e de Pablo Iglesias, que ocupa a terceira praza. Os tres compiten baixo a grímpola do CV Playa de Oza.
Na outra categoría de windsurf, Techno 293, Lindia Pousa, do RCN Rodeira, tamén brillou con tres vitorias e arrinca a Semana Galega á fronte da xeneral. Por detrás, o seu compañeiro de club, Marcos Dasilva, sitúase segundo e a terceira praza ocúpaa polo momento Patricia Teijeiro, do Liméns WSC.
Máis apertada está a xeneral da clase Vaurien, con Pablo e Isabel Cabello do RCN Vigo liderando cun só punto de vantaxe sobre os segundos clasificados, Adrián Gregorio e Antón Dopico do CVF As Pontes. Terceiros, pola súa banda, son os tamén vigueses Santiago e Teresa Cabello.
Dentro do porto, fronte á rampla do Centro Galego de Vela, competiu a frota de Radio Control, que este sábado celebraba a súa única xornada de competición. Cun total de nove probas completadas, a vitoria levouna Tomás Pérez do CN Boiro. Acompañáronlle no podio Luis Felipe Segura, do RCN Sanxenxo, e Juan Manuel Somoza, tamén do CN Boiro, segundo e terceiro respectivamente.
A clase Wingfoil foi a única que non puido competir, ao necesitar polo menos 11 ou 12 nós para poder “voar”, polo que a frota terá que esperar a mañá para inaugurar as súas marcadoras.
O domingo, Medal Race
Como xa vén sendo tradición na Semana Galega da Vela, a regata finalizará o domingo coa disputa das últimas probas de frota pola mañá e coa definitiva Medal Race pola tarde, ao redor das 16.00 horas, fronte ás inmediacións do Centro Galego de Vela.
A entrega de premios, programada para as 18.00 horas, será a encargada de poñer o broche final.
