Finalmente a actividade voluntaria e participativa de limpeza de praias en Outes que organiza a Aula Sostible do Freixo e que estaba prevista para este xoves 5 de xuño tivo que adiarse até o vindeiro 10 de xuño por mor da chuvia.
A nova cita desenvolverase como está previsto inicialmente no areal de Broña (Outes) en horario de mañá: de 11.00 a 13.30 horas. Serán benvidas todas as persoas que se acheguen a colaborar, segundo confirmaron novamente dende a organización. Trátase dunha xornada organizada desde a Aula Sostible do Freixo, a Asociación de Mulleres do Sector Pesqueiro SEO Fisterra-Ría de Muros Noia, a Asociación Misela e máis o Concello de Outes, coa colaboración da asociación ambiental Noia Limpa e as entidades inclusivas ADISBISMUR e A Creba Saúde Mental. As persoas interesadas en participar ou en obter máis información sobre a xornada de voluntariado poden chamar ao seguinte número de teléfono: 627 570 949.
