A Deputación da Coruña fixo balance do acadado en materia de emprego a través do programa PEL (liña de axudas PEL-Pemes Creación). Segundo se informa no balance, a institución provincial financiou este ano a contratación de 311 persoas en pequenas empresas, microempresas e negocios de persoas autónomas da provincia (62 persoas no Barbanza). A resolución suporá un investimento de preto de 3,5 millóns de euros destinado á creación de emprego nos concellos de menos de 20.000 habitantes.
A Deputación explicou que estas axudas “permitirán ás entidades beneficiarias cubrir ata o 70% dos custos laborais durante un período máximo de 12 meses, incluíndo soldos, cotizacións á Seguridade Social e outros gastos sociais”.
Os contratos obxecto de subvención deberán ter unha duración mínima de seis meses, e o importe máximo da subvención por persoa contratada será de 15.000 euros no caso de contratos de xornada completa dun ano.
O presidente da Deputación, Valentín González Formoso, destacou que este programa “é unha mostra clara do compromiso da Deputación coa dinamización económica e a xeración de emprego estable e de calidade nos concellos máis pequenos da provincia”. Engadiu tamén que “apostamos por un modelo de axudas que chegan directamente ás pemes e persoas autónomas, que crean postos de traballo e manteñen vivo o tecido económico e social do rural coruñés”.
Segundo os datos publicados, máis do 81% das empresas beneficiarias realizarán contratos indefinidos, e máis do 78% serán a xornada completa, o que confirma a orientación do programa cara á creación de emprego estable. A maior parte das concesións concéntranse nas comarcas de Santiago, con 97 axudas por un importe de 1.100.381,77 euros, e Bergantiños-Costa da Morte, con 69 concesións que suman 756.555,05 euros. Entre os concellos con maior número de solicitudes concedidas destacan Mazaricos (20), Ordes (14) e Cee (12).
Os municipios de entre 5.001 e 10.000 habitantes agrupan o 38,91% das concesións, mentres que os de entre 2.001 e 4.000 suman un 26,37%. Por perfil das entidades beneficiarias, as persoas autónomas son o colectivo máis numeroso, con 177 solicitudes concedidas, o que representa o 56,91% do total. Tamén destaca a presenza feminina, xa que 118 das empresas beneficiarias están lideradas por mulleres ou teñen maioría de capital social feminino, o que supón case o 38% do total.
Por sectores, o terciario é o máis favorecido (60,77%), especialmente en hostalaría e comercio, seguido do secundario (19,61%), centrado en construción e reformas, e o primario (18,01%). Ademais, case o 94% das empresas beneficiarias acceden por primeira vez a esta liña de axudas, o que reflicte a súa capacidade para chegar a novas iniciativas emprendedoras no rural.
Nos seus nove anos de historia, o PEL suma máis de 120 millóns de euros de investimento, demostrando, en palabras da Deputación, “ser de gran axuda para concellos, pemes e autónomos e ofrecendo diferentes liñas de axuda que responden ás necesidades específicas de cada colectivo”.
No balance tamén se destacan estes datos: 7.700 empregos creados no sector público e privado, 2.700 pequenas empresas beneficiadas das axudas para investimentos e modernización, 4.000 autónomos que viron reducida a súa cota mensual e máis de 260 proxectos emprendedores xerados nos 11 centros cos que conta a Rede Provincial de Espazos de Coworking da Deputación.
A listaxe completa das empresas beneficiarias pode consultarse no BOP, en formato PDF.
Datos no Barbanza
As axudas concedidas foron as seguintes: 4 en Boiro, 8 en Carnota, 2 en Lousame, 20 en Mazaricos, 11 en Muros, 3 en Noia, 7 en Outes, 4 na Pobra do Caramiñal, 1 en Porto do Son e 2 en Rianxo. O total de axudas no Barbanza é de 62, con 720.981,53 € investidos e unha porcentaxe do total concedido de case o 20%.
