A Administración autonómica tamén modificou o horario de pesca coa arte de racú e piobardeira autorizando a actividade desde 12.00 horas do domingo ata as 12.00 do luns 23 de xuño para a captura de sardiña con motivo da festividade de San Xoán. Establecese a veda do choco nas rías de Vigo e Pontevedra
A Consellería do Mar vén de aprobar, en consenso co sector pesqueiro, varios plans de xestión e medidas de conservación que afectan a distintas especies e artes de pesca nas rías galegas. Entre as máis destacadas figura a veda para o choco nas rías de Vigo e Pontevedra, que estará vixente entre o 21 de xullo e o 31 de outubro, tal como solicitara o propio sector e segundo recomendacións técnicas. Os informes científicos indican que a partir de xuño as capturas de exemplares xuvenís incrementan un 80%, polo que se adopta esta medida para garantir unha explotación sostible e responsable, tanto na pesca profesional como na recreativa.
Tamén se aprobou o plan experimental para a xestión da nécora e do camarón coa arte de nasa, que estará vixente desde o 1 de xullo de 2025 ata o 30 de xuño de 2027. Este plan mantén os períodos de veda establecidos no plan xeral de explotación marisqueira 2024-2026 e regula catro modalidades de pesca, incluíndo unha específica para as rías de Arousa, Vigo e Pontevedra. Ademais, establece unha limitación do número de nasas a bordo segundo o tamaño da embarcación e a súa tripulación, cun máximo de 225 nasas nas máis pequenas e ata 550 nas maiores.
No caso da centola e o boi, o novo plan de xestión estará en vigor desde o 21 de xuño ata o inicio da veda de 2026, aínda por determinar. Este ano, a veda queda fixada da seguinte maneira:
- Zonas A e B (do río Miño ata cabo de Estaca de Bares): do 21 de xuño ao 9 de novembro.
- Zona C (de Estaca de Bares ao río Eo):
- Centola: do 1 de xullo ao 30 de novembro.
- Boi: do 27 de setembro ao 2 de novembro.
Tamén se fixa unha cota máxima diaria de centola de 35 kg por embarcación e día, con 35 kg adicionais por tripulante enrolado.
Por outra banda, modifícase o plan experimental de trasmallos para as rías de Vigo e Pontevedra, ampliando excepcionalmente o período autorizado ata o 18 de xullo, en resposta á solicitude da Federación Provincial de Confrarías de Pontevedra. Así mesmo, autorízase o plan de boliche para a captura de lura e especies acompañantes entre xullo e outubro.
En relación coa festividade de San Xoán, a Consellería tamén acordou autorizar ás embarcacións con porto base en Galicia e despachadas para as artes de racú e piobardeira a operar desde as 12:00 do domingo ata as 12:00 do luns 23 de xuño, co obxectivo de garantir o abastecemento de sardiña no mercado. Como medida compensatoria, o día 24 será de descanso. No operativo participarán 401 embarcacións do xeito, 19 do racú e 5 da piobardeira. O ano pasado, comercializáronse máis de 14.400 toneladas de sardiña, cun valor superior aos 16,5 millóns de euros.
