A bandeira azul volverá ondear este verán na praia de Cabío-Lombiña da Pobra do Caramiñal. A concelleira de Turismo, Esfanía Ramos, acudiu este mércores 4 de xuño á entrega de distintivos, que tivo lugar na localidade de Ponteceso (A Coruña), e avanzou que este elemento colocarase “nas próximas semanas, coincidindo co inicio da tempada de verán”.
Como explica a edil, este recoñecemento outórgase en base “a unha serie de rigorosos criterios de sustentabilidade, accesibilidade e servizos”, e dá conta do “esforzo que realizamos desde o Concello para garantir que as praias da Pobra, un dos principais reclamos turísticos, estean nas mellores condicións posibles para recibir aos veciños e veciñas e visitantes”.
Neste sentido, Ramos apunta que a de Cabío-Lombiña destaca pola calidade das súas augas, situación e “polos servizos que ofrece”. Entre eles, dispón de paseo marítimo, zona de estacionamento, posto de salvamento, parque infantil, baños públicos, restaurantes e empresa de actividades náuticas.
