O Concello de Rianxo informou da apertura do prazo para solicitar as axudas municipais á implantación de novas empresas e comercios no termo municipal e a súa convocatoria para o ano 2025. Este novo programa de subvencións impulsado polo Executivo local e dotado con 10.000€, busca seguir creando emprego e favorecer a apertura de novos establecementos comerciais no municipio subvencionando parte dos gastos da súa posta en funcionamento.
“Esta iniciativa, xunto con outras que xa se executaron, diríxense a favorecer a apertura de novos establecementos comercias no noso municipio coa finalidade de dinamizar a nosa pequena e mediana economía”, destacou recentemente o alcalde Julián Bustelo, engadindo que “cada novo establecemento que abre supón un chanzo máis no camiño cara a recuperación do dinamismo comercial do noso pobo”. O rexedor tamén puxo en valor tamén o feito de que no ano 2024 Rianxo freara a perda de empresas do sector do comercio e da hostalaría. Máis información no boletín da Deputación do 9 de maio, o BOP.
Como dixemos, o importe máximo desta convocatoria é de 10.000 €.
Serán obxecto de subvención os seguintes gastos: gastos de constitución, obras de acondicionamento do local, existencias iniciais de mercadorías, gastos de alugueiro do local, vehículo industrial, aplicación informáticas equipos informáticos; primas e seguros, subministros e gastos correntes e dereitos de propiedade industrial.
