Os británicos percuran novos acordos pesqueiros coa UE e a frota pesqueira comunitaria acepta a bilateralidade no primeiro cumio entre ambas as partes. Este reencontro representa o acceso garantido das frotas aos caladoiros respectivos ao menos ata xuño do ano 2038. Deste xeito aplícase o establecido no Acordo de Retirada que regulou o Brexit.
A medida, intensamente reclamada por Francia e España, crea un evidente alivio a distintas modalidades de pesca dos barcos europeos, especialmente os galegos, en boa medida prexudicados pola saída de Gran Bretaña do seo da comunidade europea. Mais ao mesmo tempo, outorga un respiro á propia frota británica, moi dependente das augas comunitarias, nomeadamente das da canle da Mancha.
É, polo tanto, un pacto de acceso recíproco ás respectivas augas a partir de xuño de 2026 que abre un novo capítulo nas relacións bilaterais, após cinco anos da ruptura dos vínculos entre os 28, hoxe en día 27.
Garantir o acceso da frota comunitaria permite, obviamente, aos europeos faenar nos caladoiros de Reino Unido. O paso que da agora o Consello da UE aumenta de cinco a doce anos máis o acceso aos caladoiros británicos para 40 barcos galegos moi necesitados de solucións deste tipo. A pesca foi durante moito tempo, un punto de permanente fricción entre as autoridades pesqueiras británicas e os pesqueiros galegos acusados estes de faenaren ilegalmente nas súas augas, mentres que os barcos galegos culpaban ás gardacostas británicas de exhaustivas inspeccións non sempre debidamente xustificadas e con resultados moitas veces contraditorios dos que saían apresamentos e sancións que en moitas ocasións conduciron a retencións de semanas en porto e o pagamento de multas que os gardacostas non sempre xustificaron debidamente.
O acordo posqueiro acadado esta semana no primeiro cumio bilateral entre o Reino Unido e a UE após o Brexit, tivo coma testemuños a Ursula von der Leyen, presidenta da Comisión Europea, e Keir Starmer, primeiro ministro do Reino Unido.
