A asociación ecoloxista ADEGA presentou este venres no Rexistro Xeral da Xunta de Galicia 1.416 solicitudes de arquivo do expediente de tramitación da concesión de augas do río Ulla para a macrocelulosa de Altri e Greenalia en Palas de Rei, por incumprimento dos prazos legais de resolución.
O rexistro tivo lugar no mesmo día no que se cumpriu un ano desde a data límite legal (30 de maio de 2024) no que Augas de Galicia debera ter arquivado o expediente de solicitude de concesión de Altri por ter superado o prazo máximo de resoluciòn, entedéndose desestimada. Malia ter transcorridos os 18 meses fixados como prazo polo Regulamento de Dominio Público Hidráulico para resolver os expedientes de concesión, Augas de Galicia persiste en manter en trámite o procedemento administrativo derivado da solicitude de Altri para a captación de 46.000 metros cúbicos de auga de río Ulla con destino ao uso industrial na macrocelulosa de Palas de Rei.
Como consecuencia das irregularidades cometidas na tramitación da concesión de augas, milleiros de persoas e entidades galegas suscribiron a solicitude de arquivo do expediente de augas impulsada por ADEGA, moitas delas colaborando na recompilación dos escritos dirixidos a Augas de Galicia.
A concesión de augas é un dos trámites administrativos da factoría que aínda debe resolver a Xunta para autorizar a macrocelulosa de Greenalia e ten unha especial importancia para o proxecto porque o outorgamento da concesión resulta imprescindible para a viabilidade do mesmo: A auga é un elemento esencial no proceso industrial de fabricación de pasta de papel, básico esta no proxecto de Altri.
ADEGA, a Plataforma na Defensa da Ría de Arousa, a CIG e os Grupos Vivos reunidos diante do rexistro da Xunta apelaron á cidadanía galega para que participe este domingo, 1 de xuño, na mobilización que baixo o lema “Nin Ence na Ría, nin Altri na Ulloa”, vai ter lugar o vindeiro domingo en Pontevedra.
