O Concello de Ribeira continúa apostando pola mellora das infraestruturas nas parroquias e acaba de adxudicar a renovación da rede de abastecemento de auga na Rúa da Cerca, en Aguiño, unha actuación que responde ás demandas veciñais e á necesidade de modernizar unha infraestrutura deteriorada.
Na actualidade, esta rúa conta cunha rede de abastecemento de fibrocemento, un material obsoleto que provoca constantes roturas e unha presión insuficiente, deixando frecuentemente sen subministración aos fogares da zona. Para solucionar estes problemas, o proxecto contempla a substitución das tubaxes actuais nos dous marxes da rúa por novas conducións de fundición dúctil, con presión nominal de 16 atm e diámetros de 100 e 150 mm, respectivamente.
A intervención foi adxudicada á empresa Viaqua Gestión Integral de Aguas de Galicia S.A., cun investimento de 137.432,67 euros no marco do POS+2024 (Plan de Obras e Servizos da Deputación da Coruña), e contará cun prazo de execución de 4 meses.
O alcalde Pérez Barral destacou que esta obra forma parte dun conxunto de actuacións previstas na parroquia de Aguiño, entre as que figuran tamén a pavimentación das rúas Luís Seoane e Praia da Ribeira, cun investimento de 186.000 euros, a reforma do Conservatorio de Aguiño (628.226,64 euros) e a construción da sede do club de remo, entre outras melloras.-
