Esta mañá presentouse no Ateneo Valle-Inclán de Ribeira a vixilia solidaria de 24 horas convocada polo colectivo Somos Refuxio do Barbanza, en apoio ao pobo palestino e en denuncia do xenocidio que sofre baixo a ocupación israelí. Ao acto de presentación asistiron a concelleira de Cultura, Antía Alberte, e membros do colectivo como Nela Abella, Manuel González, Sonia Cassau e Valentina de la Vega.
A vixilia terá lugar na Porta do Sol, desde as 16:00 horas do sábado 24 de maio ata as 16:00 do domingo 25. Durante ese tempo, desenvolverase un programa de actividades culturais e reivindicativas, con actuacións musicais, poesía, un micro aberto e espazos informativos.
Segundo explicou Manuel González, “imos montar tendas de campaña simulando un campamento e aí teremos diferentes actividades, unha mesa informativa, actuacións musicais voluntarias e micro aberto para quen queira participar”. Animou tamén á cidadanía a colaborar levando candeas, bandeiras ou carteis reivindicativos.
A concelleira de Cultura, Antía Alberte, agradeceu a iniciativa de Somos Refuxio e sinalou que “é necesario visibilizar a masacre que está sufrindo o pobo palestino”. O Concello de Ribeira colabora co evento mediante o apoio técnico e sonoro. A edil tamén destacou que as actuacións serán sinxelas e de carácter acústico, e solicitou que os músicos leven o seu propio equipamento.
Unha chamada á conciencia colectiva
O acto pretende ser un xeito simbólico de expresar que O Barbanza non esquece a crise humanitaria que vive Palestina. Desde hai máis dun ano, a poboación palestina sofre unha escalada de violencia sistemática, con bloqueos á axuda humanitaria, situacións denunciadas por múltiples organismos internacionais como crimes contra a humanidade.
O colectivo Somos Refuxio, creado en 2016 para apoiar ás vítimas da guerra en Siria, volve agora mobilizarse ante o conflito en Palestina.
Programa de actividades
Durante a vixilia, haberá:
- Actuacións musicais de artistas como Bailadela, Barahúnda, Beíña, Boroa, Chamaquito Pistolas, Juan Sieira, Rubén Cores, Olga e Harpo Antonio, Latexo Percusión, Lau Panicanela, Os Barbansónicos, Suso Bello e Tonhito de Poi, entre outros.
- Micro aberto para intervencións espontáneas, testemuños e poesía.
- Espazo informativo sobre a situación actual en Palestina.
As actividades desenvolveranse principalmente entre as 18:00 e as 24:00 horas do sábado, e entre as 12:30 e as 14:00 do domingo.
A solidariedade non ten horario
O colectivo Somos Refuxio anima a toda a veciñanza a achegarse, aínda que sexa por uns minutos, para sumar forzas nun acto de solidariedade que busca manter viva a memoria e a denuncia social. A participación é libre, e convídase ao público a levar elementos simbólicos como candeas ou mensaxes de apoio.
