O sábado 7 e o domingo 8 de xuño celebraranse en Rianxo unhas xornadas informativas sobre o programa de acollida Vacacións en Paz 2025, impulsado pola organización SOGAPS, Solidariedade Galega co Pobo Saharauí, un programa que permite que estes nenos e nenas pasen o verán afastados das temperaturas que nestes meses se acadan nos campos de refuxiados do deserto. As persoas interesadas en participar e colaborar poden chamar aos teléfonos 986 262 637 e 678 727 382, ou enviar un correo a asociacionsogaps@yahoo.es.
Vacacións en Paz é un proxecto de acollida temporal de nenos e nenas saharauís en familias, durante os meses de xullo e agosto, que en Galicia desenvolve Solidariedade Galega co Pobo Saharauí (SOGAPS), en colaboración co goberno da República Árabe Saharauí Democrática (RASD) e cos concellos galegos, entre outras entidades.
Estes nenos/as viven nos campamentos de refuxiados situados, en Tindouf, no deserto do Sáhara, en Alxeria. A súa vida transcorre en duras condicións, privados do máis elemental e sobrevivindo grazas á axuda internacional.
Vacacións en Paz permítelles abandonar o deserto nos meses de máis altas temperaturas, que poden chegar ata os 50 graos, realizar revisións médicas, recibir unha alimentación rica e variada e descubrir unha cultura diferente.
