A Consellería do Mar, a través de Portos de Galicia, investiu 180.000 na renovación de pavimentos esgotados nos portos de Ribeira e A Pobra do Caramiñal, na Coruña. As obras, segundo informou o dito organismo da Xunta, “atópanse en execución esta semana e permitirán dotar de novos firmes as explanadas e os viarios que presentaban necesidades en ambos portos, así como repintar a sinalización horizontal”.
Ambas actuacións enmárcanse nun plan global para 26 dársenas autonómicas no que Portos de Galicia inviste 1,6 millóns de euros para substituír e reforzar os pavimentos esgotados.
No marco deste plan executaranse obras que inclúen a dotación de novas capas de firmes de reforzo, a reposición naquelas zonas nas que o pavimento fora esgotado e a reposición de firmes de formigón armado, ademais de labores de saneo de explanadas.
Portos de Galicia engade que “como complemento destas actuacións, atenderase tamén a deixar a cota os pozos, arquetas e sumidoiros existentes e pintarase nova sinalización horizontal”.
Deste xeito, o organismo prevé mellorar a seguridade viaria de condutores e peón que transitan pola zona.
En concreto, no porto de Ribeira executarase un novo pavimento en varias zonas do peirao, o aparcadoiro da lonxa, o paseo das Carolinas e a avenida do Malecón. O orzamento total desta actuación é de 140.000 euros.
Polo que respecta á Pobra do Caramiñal, os traballos realízanse na rúa Fernández Varela, entre a rúa da Paz e a Rúa Anxo Rei Ballesteros, no acceso aos peiraos do Club Náutico e no peirao pesqueiro. O orzamento será de 40.000 euros e incluirá a posta a conta de tapas e grellas de sumidoiro e reposición de marcas viarias.
