A clásica “fumata” que anuncia a elección de novo Papa segue a ser unha ensoñación: o sucesor do Papa Francisco está por chegar, porque a cheminea do Vaticano non “fala”. Mais si o fai o silencio dos máis dun cento de purpurados de 71 países que, malia ter a obriga de non comentar nada nada ao respecto entre os seus compañeiros electores e elexíbeis, deixan adiviñar – tamén estará prohibido “dicir” sen falar?- por onde van as predicións das Súas Eminencias: Seguiren os postulados progresistas do Papa Francisco ou desandar o camiño percorrido polo ata o de agora xefe da igrexa católica mundial chegado de Arxentina coma un peregrino?.
Moitos millóns de televidentes mantiveron prendido onte da televisión e a radio o seu interese e desexo de saber se o “pibe” Francisco tiña remuda na cadeira de Pedro. Mais a cheminea vaticana botou unha bafarada de fume negro que non anunciaba outra cousa que non había novidade, que todo segue igual. Que talvez este xoves. Ou quen sabe se será mañá.
Sexa quen sexa, oxalá siga quen ocupe a cadeira vacante a liña de comuñón iniciada por Francisco con aqueles que máis precisan da comprensión e axuda de quen está recoñecido mundialmente como a cabeza visible da Igrexa Católica. De paso, que limpe ou faga limpar o constante ruxe ruxe da Congregación eclesiástica que nen sequera para no Sínodo que, silandeiramente, debe representar ao Deus dos católicos na Terra.
Será o xoves, hoxe, o día?. Que camiño vai seguir o sucesor de Francisco?. Quedan horas para sabelo. O fume branco dirá se habemus Papa.
