O Laboratorio Ecosocial do Barbanza organiza unha xornada de identificación participativa de biodiversidade, coordinada por Fundación Montescola coa colaboración da CMVMC de Leiro.
O vindeiro domingo 11 de maio, ás 10:30 da mañá, o monte de Leiro, en Rianxo, converterase no escenario dunha nova xornada de ciencia cidadá promovida polo Laboratorio Ecosocial do Barbanza. A actividade, un Bioblitz, consistirá na identificación participativa de especies e está aberta a todos os públicos, sen necesidade de coñecementos previos.
O punto de encontro será o estacionamento da praia das Cunchas, desde onde partirá o grupo participante. A proposta está coordinada pola Fundación Montescola, en colaboración coa Comunidade do Monte Veciñal en Man Común de Leiro, que apoia esta iniciativa de valorización do seu patrimonio natural.
Durante a xornada, as persoas asistentes terán a oportunidade de colaborar cun equipo multidisciplinar de especialistas en botánica, entomoloxía, ornitoloxía e micoloxía para rexistrar o maior número posible de especies presentes no espazo natural nun tempo limitado. O obxectivo é achegar a biodiversidade local á cidadanía e fomentar a súa implicación na protección dos ecosistemas.
As persoas interesadas poden inscribirse até o venres 9 de maio, enviando un correo electrónico a info@montescola.org.
O Laboratorio Ecosocial do Barbanza, promotor da iniciativa, é un proxecto coordinado pola Fundación RIA e conta co apoio da Fundación Biodiversidad do Ministerio para la Transición Ecológica y el Reto Demográfico (MITECO), no marco do Plan de Recuperación, Transformación e Resiliencia (PRTR), financiado pola Unión Europea – NextGenerationEU. A súa misión é impulsar a transición cara á sustentabilidade ambiental e reforzar a resiliencia na xestión territorial dos montes do Barbanza.
