O monte de Filgueiras (Taragoña, Rianxo) acolle o vindeiro sábado 31 de maio a IV Romaría das Fousas, organizada novamente polo colectivo Fousas ao monte ao abeiro do seu incansábel traballo pola difusión e o impulso dunha xestión alternativa do monte, sustentábel e afastada do monocultivo.
O programa de actividades inclúe deporte, música e faladoiros para desfrutar dunha xornada festiva e reinvindicativa no noso monte.
En concreto, a romaría acollerá un biathlon de toxeira, un faladoiro sobre agrupacións forestais conxuntas, unha sesión vermú con Silvaredonda (ás 13h), un concurso e un bingo musical logo do xantar, un obradoiro de trepa e tirolina, un concerto ás 18.00 horas con Resiudos Atractivas, unha sesión DJ con Maruxa e Coralia (ás 20h) e un concerto con Misto e Ghasolino (ás 21.00 horas).
Ademais, o programa de actividades inclúe un concurso musical. O premio para o equipo gañador consistirá en tres menús no Restaurante Casa Isolina no Campo de Pasos.
A maiores, no transcurso do evento entregaranse os Premios Fousellos de Ouro, que recoñecerán o labor daquelas persoas ou entidades que están a traballar, dende o asociacionismo ou o voluntariado, pola mellora da biodiversidade, a loita contra as especies invasoras e a xestión ordenada e sostíbel do monte e do territorio.
Organiza Fousas ao Monte coa colaboración do Concello.
