A Consellería de Educación publicou este xoves no Diario Oficial de Galicia o calendario oficial para o curso escolar 2025/26. Segundo o documento, o curso dará comezo o 8 de setembro e finalizará o 19 de xuño para todas as etapas educativas, agás excepcións puntuais.
Entre estas excepcións destacan os segundos cursos dos ciclos formativos de FP Básico, Medio e Superior, que concluirán o 15 de xuño, e as ensinanzas de réxime especial, que poderán adiar o inicio ata o 15 de setembro, tendo en conta as súas particularidades.
Así mesmo, o alumnado de 2º de Bacharelato rematará o curso segundo as datas establecidas para a celebración da Avaliación para o Acceso á Universidade (PAU).
Os máis pequenos, que se incorporen por primeira vez á Educación Infantil, contarán cun período de adaptación que non poderá prolongarse máis aló do 12 de setembro.
Períodos de vacacións e días non lectivos
O calendario escolar inclúe tamén os principais períodos de vacacións:
- Nadal: do 22 de decembro ao 7 de xaneiro (ambos inclusive).
- Entroido: do 16 ao 18 de febreiro.
- Semana Santa: do 30 de marzo ao 6 de abril (ambos inclusive).
Tampouco serán días lectivos as festividades de ámbito estatal e autonómico, así como o Día da Educación, que se celebrará o 31 de outubro (venres), e o 3 de novembro (luns).
Avaliacións de diagnóstico
No marco da programación do curso, tamén se recollen as datas das probas de avaliación de diagnóstico impulsadas polo Goberno central:
- Para 4º de Primaria, entre o 20 e o 24 de abril.
- Para 2º da ESO, entre o 13 e o 17 de abril.
Con este calendario, a Consellería de Educación marca os principais fitos do próximo curso escolar, buscando compatibilizar o desenvolvemento académico co benestar do alumnado e o funcionamento equilibrado dos centros educativos.
