O Concello de Outes impulsa esta tempada estival unha nova edición do seu Campamento de Verán (Programa Outes Concilia), destinado a facilitar que as familias harmonicen a vida laboral e o tempo de lecer. Levarase a cabo durante as vacacións de verán, dende o 23 de xuño, día seguinte ao remate do curso escolar 2024-2025 ata o día anterior ao inicio do curso escolar 2025-2026, podendo as familias elixir as quendas que precisen.
O campamento desenvolverase nas instalacións do edificio do antigo colexio do Cruceiro de Roo en horario de 8:00 a 16:00 horas. As familias poderán facer uso do servizo en función das súas necesidades permitindo a entrada e saída flexíbeis. Para un bo desenvolvemento das actividades programadas, recoméndase a aquelas familias quen non vaian a facer uso do horario completo do campamento, incorporarse ao mesmo sobre ás 10:00 h. e saída a partir das 13:30 h. Os menores teñen opción de almorzar e xantar no mesmo, sendo as familias as encargadas de aportar os alimentos, en termos e neveiras.
As actividades que se programan para o campamento están adaptadas á idade dos nenos e nenas podendo gozar de numerosos xogos como os tradicionais, da natureza, predeportivos,…, habendo tamén saídas a parques, traballos manuais…
Está dirixido ás familias con menores de 3 anos (escolarizados) a 16 anos. As prazas son limitadas. As quendas 1ª e 6º veñen con 40 prazas e as quendas 2ª, 3ª, 4ª e 5ª con 60.
O prazo para o campamento de verán rematou este luns 12 de maio ás 14:00 horas. As persoas interesadas poden enviar igualmente as solicitudes de inscrición fora de prazo, xa que se atenderá ás mesmas segundo haxa vacantes nas prazas solicitadas, quedando nun listado de agarda en caso contrario.
