O Pazo de Goiáns acolle o vindeiro 17 de maio a XIV edición da Romaría das Letras do Barbanza da man do Concello de Boiro e a Asociación Cultural Barbantia. A concelleira de Cultura, María Outeiral, e a presidenta de Barbantia, María Xesús Blanco, presentaron o programa de actividades.
Despois das 17 bombas de palenque, ás 11.30 horas abrirá a feira artesá e literaria cos stands dos colectivos colaboradores como Sancosmeiros, Artesanías Amorote, Sin Norte Creativas, Palilleiras Revolteir@s e Ganchilleiras de Bealo, librarías Espazo Nobel de Boiro e LER da Pobras, Che Tembra, Rositas Artesanía, Adanegra… durante o día haberá tamén un obradoiro de instrumentos tradicionais con Os Menestreis a cargo de Xulio Gutiérrez e un photocall de traxe tradicional galego.
Ás 12.00 horas actuarán no escenario grande AC Pedra da Aroña e Grupo Abeloura e ás 13.30 horas As mulleres que cantan, foliada homenaxe coas cantareiras Mar de Cabo, Lumieira, Xoaniñas, Aroña e Abanqueiro.
Logo do xantar popular, o programa de actividades reiníciase ás 16.00 horas co acto institucional e presentacións literarias no interior do Pazo. Celia Díaz presentará o seu libro A avoa canta como a catovía e Carlos Callón Maxicamente vella, eternamente nova. Ademais celebrarase a entrega institucional da peza da Serea de Susi Gesto e un espectáculo teatralizado do grupo Airiños de Rianxo.
Ás 17.00 horas Marta Ríos fará unha visita teatralizada para familias; ás 18.30 horas baile galego con Xilbarbeira e grupo de Baile de Abanqueiro e para rematar a xornada concerto con Carmela e Nunca é Tarde.
A concelleira de cultura, María Outeiral, animou a toda a veciñanza de Boiro e a contorna a que asista a Goiáns para desfrutar desta Romaría das Letras: “É un dia para desfrutar en familia de todas as actividades culturais e da nosa tradición, polo que animamos á xente a que se caracterizarse con algún elemento da roupa tradicional galega”.
Programa de actividades ao detalle
11.00h – Apertura do recinto e recibimento participantes da XIV Romaría das Letras no Barbanza
11.30h – Apertura da Feira artesá e literaria cos stands dos colectivos colaboradores e a exposición dedicada ás Cantareiras, homenaxeadas co Día das Letras Galegas 2025.
12.00h – Actuación de baile galego no escenario grande do Pazo: AC Pedra da Aroña e Grupo Abeloura
13.30h – As mulleres que cantan, no xardín do Pazo: foliada homenaxe coas cantareiras Mar de Cabo, Lumieira, Xoaniñas, Aroña e Abanqueiro.
14.30h – Xantar no Pazo de Goiáns con polbeira e viños da terra.
16.00h – Acto institucional e presentacións literarias no interior do Pazo
• Presentación do libro A avoa canta como a cotavía de Celia Díaz Núñez. Ilustracións de Alba Santa. Editorial Galaxia
• Presentación do libro Maxicamente vella, eternamente nova. A literatura tradicional galega, de Carlos Callón. Editorial Xerais
• Entrega institucional da peza da Serea de Susi Gesto realizada no obradoiro do ano 2024.
• Espectáculo teatralizado o grupo Airiños de Rianxo
17.00h – Visita teatralizada para familias con Marta Rios
18.30h – Vaile galego na eira do Pazo: Xilbarbeira e Grupo de Baile de Abanqueiro
19.30h – Concerto con Carmela e Nunca é tarde
20.30h – Foliada aberta
22.00h – Remate da XIV Romaría das Letras no Barbanza
