Este xoves tivo lugar a presentación oficial de “Mimarte Fest 2025”, un evento solidario que se celebrará o domingo 22 de xuño ás 20:30 h no Auditorio Municipal, co obxectivo de recaudar fondos para a asociación Callejeros Barbanza.
No acto participaron a concelleira de Benestar Animal, Antía Alberte, a presidenta de Callejeros Barbanza, Rosa Gómez, e a xerente de Mimarte, Tania Fuegho. As entradas, cun prezo simbólico de 5 euros, estarán dispoñibles en Mimarte (Avda. Rosalía de Castro, 54) e Xade (rúa de Galicia, 53).
Antía Alberte destacou o compromiso do Concello co benestar animal, sinalando que “imos aumentando pouco a pouco o número de actividades” e que se están “ultimando protocolos de actuación en casos de emerxencia para animais feridos ou extraviados”. A concelleira tamén puxo en valor o traballo das entidades locais de protección animal e animou á veciñanza a “gozar dunha velada agradable por unha boa causa”.
Pola súa banda, Tania Fuegho explicou que será “unha gala de variedades” protagonizada, sobre todo, polos máis pequenos. O espectáculo contará con sete pezas musicais interpretadas polos grupos infantil e xuvenil do espazo creativo, ademais de actuacións para adultos, danzas urbanas e exhibicións diversas.
Finalmente, Rosa Gómez agradeceu tanto a Mimarte como á concellería pola súa colaboración, resaltando a importancia de iniciativas como esta para seguir apoiando aos animais abandonados da comarca.
