A directora xeral de Pesca, Acuicultura e Innovación Tecnolóxica, Patricia García, participou este sábado na iniciativa De Pobra a Portosín, tapeando polo mar, unha acción promovida polas asociacións de empresarios e hostaleiros da zona en colaboración coa Consellería do Mar. Esta proposta gastronómica e cultural, que busca dinamizar a vida socioeconómica das localidades costeiras participantes, desenvolverase ata os días 6 e 7 de xuño, cando terá lugar a súa última celebración.
O propio conselleiro do Mar xa asistira ao acto inaugural o pasado 16 de maio, apoiando esta actividade que ten como obxectivo principal poñer en valor os produtos do mar locais, impulsar o consumo de peixe fresco e de tempada, e fomentar a colaboración entre os concellos implicados.
O evento xira arredor de tres especies mariñas emblemáticas —o mexillón, o atún e a anchoa—, que van rotando como protagonistas nas diferentes localidades durante os fins de semana. A programación inclúe showcookings en directo a cargo de recoñecidos cociñeiros e profesionais da hostalería da zona, así como foodtrucks con propostas culinarias innovadoras baseadas nos produtos do mar.
Con esta iniciativa, ademais de promover a gastronomía e os recursos mariños, preténdese reforzar o turismo vinculado á actividade marítimo-pesqueira, creando sinerxías entre sectores clave para o desenvolvemento sustentable das vilas participantes.
