Comezou a conta atrás para o inicio da edición 2025 do Festival Hórreo Vivo, que se celebra no Araño da man da Asociación Cultural A Carballeira de Baia coa colaboración do Concello de Rianxo. Serán, en palabras da organización, “dúas xornadas con moito humor, xantar popular e música galega de primeiro nivel para homenaxear e divulgar o hórreo máis grande do mundo”. Haberá acceso de balde e actividades para todas as idades.
A programación comeza o venres 23, coa actuación musical de Blues do País ás 21:30 h, seguida ás 22:00 h por unha sesión de monólogos a cargo de Federico Pérez e Paula Carballeira, dous referentes do humor e da escena galega.
O sábado 24 será unha xornada completa, que arrincará ás 12:00 h cun roteiro pola aldea e visita ao hórreo, xoia arquitectónica da parroquia e do concello. Ás 13:30 h terá lugar a sesión vermú coa música de Maria Raxeta e Quinkillada, acompañada dun xantar popular desde esa mesma hora.
Pola tarde, o escenario acollerá o concerto sobremesa de Pulpiño Viascón (16:00 h) e as tradicionais Araño Olimpiadas (17:00 h). Ás 19:00 h, os máis pequenos poderán desfrutar do espectáculo infantil Peter Punk: Peor Imposible.
A noite pecharase con concertos de De Ninghures e Mondra a partir das 21:00 h, e ao remate, unha actuación especial de Maruxa & Coralia (Dilles).
O Festival Hórreo Vivo aposta pola cultura local, a música en galego e a posta en valor do patrimonio etnográfico do Araño, todo nun ambiente familiar e festivo. A entrada é libre, mais está prohibida a entrada con bebida ao recinto.
Organiza: Asociación Cultural A Carballeira de Baia
Patrocina: Concello de Rianxo, Deputación da Coruña
Colaboran: Comunidade de Montes Araño, REI Zentolo, Rent Galicia Inmobiliaria
Máis información:
Instagram: @Festival Hórreo Vivo
Web: www.araño.gal
