Na mañá de hoxe, venres 23 de maio, o Pazo de Goiáns (Boiro) acollía a segunda edición do Certame de Regueifas dos centros de ensino do municipio, unha iniciativa do Concello de Boiro xunto cos equipos de Dinamización da Lingua Galega dos centros. No encontro tamén estivo presente a concelleira de Ensino, Carmen Silva, xunto co alumnado dos distintos centros de ensino, que ao longo do curso realizaron uns obradoiros impartidos nos centros para familiarizarse coa regueifa e practicar xogos de palabras.
Sinalar que o festival estivo presentado por Lupe Blanco e Luís O Caruncho, e participaron os centros: o CEIP Santa Baia, IES A Cachada, CEIP Santa María do Castro, CEIP Escarabote, CEIP Cespón, CEIP Praia Xardín, IES Praia Barraña e CEIP de Abanqueiro.
Cada centro preparou unhas coplas durante os obradoiros que hoxe expuxeron sobre temas de actualidade e tamén sobre Boiro e sobre a nosa paisaxe. Posteriormente tiveron lugar uns xogos de improvisación entre os presentadores e os representantes de cada centro.
Cómpre dicir que o obxectivo desta actividade é dar a coñecer entre a rapazada a poesía oral improvisada en verso e a nosa tradición explicando a historia regueifeira e outras expresións da improvisación que existen en Galicia. Asemade, preténdese espertar no alumnado posíbeis vocacións nesta práctica artística cun importante labor didáctico nos contidos de materias como a lingua galega ou a música.
