A delegada da Xunta na Coruña, Belén do Campo, acompañada polo alcalde Porto do Son, Luis Oujo e polo director territorial da Consellería de Educación, Indalecio Cabana, visitaron este luns 5 de maio o IES Porto do Son, onde comprobaron a satisfacción dos alumnos do ciclo que se imparte neste centro como é o Grao Medio en Guía no Medio Natural e de Tempo Libre (TEGU) que ten unha duración de 2.000 horas lectivas con 14 módulos profesionais.
Belén do Campo destacou que a formación tan completa deste ciclo abre a posibilidade de traballar e facer prácticas no Parque Nacional en Sálvora, e nos Parques Naturais da provincia de Corrubedo e Fragas do Eume. Os representantes do centro educativo tamén lle trasladaron a súa proposta de contar cun ciclo superior.
Engadiu que as principais motivacións profesionais dos que cursan esta formación son exercer como profesionais de actividades de lecer e tempo Libre.
Algunhas das actividades máis relacionadas con TEGU son traballar en empresas do sector turístico e realizar labores de guía en actividades de sendeirismo, roteiros de baixa e media montaña, travesías, roteiros con neve, barrancos, espeleoloxía, bicicleta e turismo ecuestre. Tamén poden exercer como socorristas en diferentes ámbitos.
Belén do Campo exaltou a “dinámica alcista” dos datos de inserción laboral das persoas tituladas da FP en Galicia, que confirman estes ensinos, dixo, como “unha opción educativa de calidade, de éxito e de futuro para a mocidade galega”. A representante do Goberno autonómico lembrou que existen na comunidade 150 centros que imparten Formación Profesional, dos cales 93 están na provincia da Coruña e 11 na comarca do Barbanza, en Porto do Son, Ribeira (3), Pobra (2), Noia (2), Boiro, Rianxo e Muros.
