A sala de exposicións da Casa da Cultura de Porto do Son acolle, ata o 31 de maio, a exposición de pintura Historias Debuxadas de Antonio Pérez.
A mostra poderase visitar en horario de 8:00 a 15:00 e a entrada é gratuíta. Antonio Pérez é un artista e profesor de Ribeira centrado en homenaxear, plasmando até o máis mínimo detalle, os traballos mariñeiros da súa terra natal, con taller e centro de formación na praza de Compostela en Santa Uxía.
Antonio Pérez (Ribeira, 1951) é un dos artistas máis destacados da nosa comarca e un dos máis sobranceiros representantes galegos da arte mariñeira. Recentemente, en 2022, inaugurou en Ribeira, no Centro Cultural Lustres Rivas, a mostra Ribeira: mulleres, homes e peixes, formada por cincuenta cadros que plasman diferentes escenas dos labores tradicionais vencellados ao mar. En xuño de 2024 achegou no Auditorio de Rianxo outra exposición: As Mulleres e o Mar, pinturas e gravados de Antonio Pérez.
Pérez explicou recentemente que os seus cadros levan unha longa preparación tras de si: “Toda unha vida, pois todo canto fago vai dar ao mesmo sitio: aos recordos e experiencias que tiven nos cinco anos que pasei traballando no mar”.
