ULA Libraría Social, con sede na Serra de Outes, vai acoller este venres 30 de maio, ás 19.30 horas, unha nova presentación editorial. Trátase da presentación do libro fotográfico From portrait to self-portrait (Do retrato ao autorretrato) do artista Antonio Nodar. É un traballo que recolle retratos de artistas recoñecidos a nivel internacional e se lles convida a manipular o propio retrato para xerar una obra de arte.
O libro documenta e rexistra un proxecto innovador e pioneiro de Antonio Nodar, que desde o 1996, non parou de fotografar artistas polo mundo, retratándoos en branco e negro. A metodoloxía foi a seguinte: cada artista recibía a súa fotografía e devolvíaa despois de intervir sobre ela con total liberdade.
Nodar, un dos máis prestixiosos artistas do panorama actual galego, é natural de Baíñas (Vimianzo). Ten residido en París e Londres. Para o seu proxecto Do retrato ao autorretrato viaxou por cidades como París, Londres, Barcelona, Kathmandu, Pokhara, San Salvador ou A Coruña.
