A sede do Parque Nacional das Illas Atlánticas en Vigo acolleu este venres, 16 de maio, o acto de clausura e entrega de diplomas do ciclo formativo impartido en Pontevedra no marco do proxecto Interparques – Ecoturismo Inclusivo. Este comprendeu os cursos de Axente dinamizador de rutas turísticas sostíbeis en espazos naturais e Ecomarketing en turismo de espazos naturais, así como formación en competencias transversais e habilidades blandas. A iniciativa está organizada pola asociación Amicos, entidade inclusiva do Barbanza, e Servinserta, e cofinanciado polo FSE+ a través do Programa Empleaverde da Fundación Biodiversidad, do Ministerio para a Transición Ecolóxica e o Reto Demográfico.
As formacións, que se desenvolveron en Pontevedra durante case dous meses, contaron coa participación de quince persoas con discapacidade intelectual e/ou en risco de exclusión social. Delas, catro serán inseridas laboralmente no Centro Especial de Emprego Servinserta, para desenvolver labores de apoio aos guías turísticos e dinamización de rutas e paquetes turísticos sostíbeis no Parque Nacional Marítimo-Terrestre das Illas Atlánticas.
O evento estivo conducido por Miguel Beiro, responsábel da área de Alianzas con Persoas e Empresas de Amicos; José Antonio Fernández Bouzas, director do Parque Nacional das Illas Atlánticas; e Pedro Dono, director de Recursos Humanos en Grupo Puentes. Eles foron os encargados de facer entrega dos diplomas acreditativos ao alumnado da formación.
Durante o acto, o director conservador do Parque Nacional marítimo-terrestre das Illas Atlánticas destacou que “a experiencia mostrounos que estas formacións son moi completas, un coñecemento que se asenta co traballo de cada día. Dende o Parque queremos agradecervos de corazón esta formación”. Durante a intervención tamén recalcou “que todos temos algo que dicir sobre medio ambiente, e todos debemos ser escoitados”.
Dende Amicos, Miguel Beiro quixo destacar “a nosa gratitude co Parque Nacional das Illas Atlánticas, que un ano e dálles unha oportunidade de realizarse laboralmente aos integrantes de Amicos para levar a cabo os traballos de divulgación e preservación medioambiental na zona, e por apostar pola creación dun parque natural inclusivo”.
Asemade, tamén quixo destacar “a presencia de representantes de Grupo Puentes, empresa que, grazas ao seu apoio anual á nosa entidade, favorece que en Amicos poidamos crear postos de traballo a través dos que ofrecer capacitación e experiencia laboral ás persoas con discapacidade intelectual”.
