Ribeira continúa mellorando os servizos básicos nas parroquias con novas obras en Corrubedo
O Concello de Ribeira segue avanzando no seu plan de mellora das infraestruturas básicas nas parroquias co remate das obras de pavimentación e renovación do saneamento na rúa do Colexio de Corrubedo, finalizadas o pasado 13 de abril cun investimento de 67.000 euros.
Esta actuación forma parte dunha estratexia máis ampla impulsada polo goberno local, que inclúe tamén a próxima intervención na rúa Canaval, onde se renovará o saneamento e a rede de pluviais cun orzamento de 45.000 euros. A obra, recentemente adxudicada á empresa Excavaciones Nima S.L. por 37.697,04 euros no marco do POS+ 2024, ten un prazo de execución de tres meses.
Segundo explicou o alcalde, Luís Pérez, estas obras súmanse a outras xa executadas nos últimos meses, como a mellora das beirarrúas na contorna do Faro de Corrubedo, a renovación do saneamento na rúa Buenos Aires, a pavimentación e mellora da rede de pluviais na rúa dos Pozos ou as actuacións nas pistas de tenis de Saamil. “Estamos a falar de máis de 412.000 euros destinados á mellora de servizos básicos como o saneamento, a seguridade viaria, a accesibilidade ou as infraestruturas deportivas. Este goberno local está comprometido con dar resposta ás necesidades reais das parroquias e imos continuar nesta liña”, sinalou o rexedor.
A rúa Canaval presenta actualmente un pavimento moi deteriorado, tanto nas beirarrúas como na calzada, e carece de rede separativa para as augas residuais e pluviais, o que provoca constantes avarías. O proxecto contempla a instalación de novas tubaxes de PVC para as augas fecais e pluviais, con pozos de rexistro, arquetas sumidoiro e renovación das acometidas domiciliarias, así como o seu entroncamento coas redes existentes.
En canto á pavimentación, dotarase a vía cun novo pavimento continuo de formigón puído en cor, intercalado con pezas de lastra de granito de 20x10x8 cm, asentado sobre unha subbase de saburra artificial.
