A Consellería de Cultura presentou os detalles dunha nova edición da Carreira Camiño das Letras, a proba deportiva de Xurdir Eventos e a Xunta para festexar a lingua galega na que se combina actividade física, celebración cultural e posta en valor do Camiño de Santiago. Segundo explicaron o conselleiro José López Campos, o secretario xeral da Lingua, Valentín García, e o director xeral de Cultura, Anxo M. Lorenzo, a iniciativa celebrarase o vindeiro sábado 17 de maio con dúas rutas principais. A primeira delas, de 15 quilómetros, partirá do Pico Sacro con meta na Cidade da Cultura (Santiago), mentres que a outra, con 5 quilómetros, fará un percorrido polo Bosque de Galicia (Santiago).
“Esta carreira é só unha mostra máis das moitas colaboracións que levamos a cabo no marco das Letras Galegas para homenaxear ás cantareiras desde diferentes manifestacións”, apuntou López Campos, explicando que esta actividade forma parte da programación impulsada desde o Goberno galego en colaboración coa Real Academia Galega, o Consello da Cultura Galega, a CRTVG e outras entidades públicas e privadas e que inclúe máis de 100 propostas en museos, bibliotecas, arquivos e espazos privados que abranguen desde exposicións, obradoiros ou concertos ata relatorios ou actividades infantís.
Desta volta a colaboración faise coa empresa Xurdir e a Federación Galega de Atletismo para ofrecer unha alternativa que é xa un referente, tanto polo seu valor deportivo como pola súa capacidade para asociar o espírito das Letras Galegas aos valores de superación e participación comunitaria.
Tanto a proba principal como a segunda farán saída ás 10,00 horas, mentres que a partir das 12,00 horas será a quenda da rapazada, que poderá competir en diferentes distancias segundo a súa idade (categorías de sub 6 a sub 16) nun circuíto habilitado na Cidade da Cultura. Todas as persoas participantes recibirán un agasallo consistente nun libro e o diploma Camiño das Letras, como símbolo da unión entre deporte, lectura e tradición.
As inscricións están abertas ata o mércores 14 de maio ás 23:59 horas na páxina web da Federación Galega de Atletismo, cun custo de entre 2 e 13 euros segundo a modalidade. Os dorsais poderán recollerse o día anterior na sede de Xurdir ou o propio día da proba no Gaiás. Ademais, contarase con servizo de autobuses entre a Cidade da Cultura e o Pico Sacro, gardarroupa, avituallamento, masaxistas e duchas.
A organización repartirá trofeos e lotes de libros ás persoas gañadoras e aos clubs e centros educativos con maior participación, consolidando así o carácter participativo, educativo e simbólico desta carreira única no calendario galego.
