A Xunta de Galicia, a través da Dirección Xeral de Patrimonio Natural, vén de adxudicar por preto de 30.000 euros un contrato para levar a cabo accións de control sobre o visón americano (Neovison vison) no Parque Natural Complexo Dunar de Corrubedo e Lagoas de Carregal e Vixán.
Esta especie, incluída no Catálogo español de especies exóticas invasoras, representa unha ameaza para a biodiversidade autóctona, especialmente pola súa incidencia como depredador dos niños e polos da píllara das dunas (Charadrius alexandrinus), unha ave en perigo de desaparición nos areais galegos.
A medida forma parte do proxecto Iberalex (“Xestión sostible de praias e humidais ibéricos”), que busca compatibilizar os usos humanos coas necesidades de conservación da píllara das dunas, e está financiado polo Fondo Europeo de Desenvolvemento Rexional a través do programa EP-Interreg VA España-Portugal (Poctep) 2021-2027.
Os traballos, que se desenvolverán entre este ano e o próximo, consistirán na colocación de gaiolas-trampa sobre plataformas flotantes para capturar de forma selectiva exemplares de visón americano. Esta técnica, segundo fontes da Consellería de Medio Ambiente, demostrou unha alta eficacia en proxectos previos e converteuse na ferramenta principal para o control desta especie invasora.
Con esta iniciativa, a Xunta busca mellorar o estado de conservación da píllara das dunas e do ecosistema no que habita, nun espazo natural de alto valor ecolóxico e dentro dunha estratexia máis ampla de xestión sustentable das zonas costeiras e húmidas.
