A praia da Corna volverá ser escenario do deporte e da festa coa celebración da IV Palmeira International Cup 2025 de Futevolei, un deporte que mestura o voleibol co fútbol e que se practica sobre a area, especialmente durante a tempada estival.
O evento, organizado polo Club Futevolei Vigo coa colaboración do Concello de Ribeira, desenvolverase o sábado 24 de maio á altura do merendeiro da praia palmeirana. As inscricións teñen un custo de 10 euros e poden formalizarse a través do número de teléfono 619 625 202 ata o martes 20 de maio.
Na presentación oficial estiveron presentes o concelleiro de Deportes, Xabier Vidal; o presidente do club organizador, Alberto Coya; e o veciño e membro do club José Vicente Domínguez, coñecido como Chento, principal impulsor da celebración do evento en Palmeira.
Vidal quixo agradecer ao Club Futevolei Vigo e especialmente a Chento “por facer posible que esta Copa se celebre un ano máis”, e animou á cidadanía a participar “neste evento singular e a gozar do entorno privilexiado da Corna”.
O torneo, que terá formato de exhibición, emparellará xogadores novatos con outros máis experimentados, co obxectivo de promover a aprendizaxe e o goce do xogo. A competición desenvolverase durante toda a mañá e rematará cunha final prevista para as 14:30 horas. Posteriormente, celebrarase unha churrascada con música en directo para todos os participantes.
José Vicente Domínguez destacou a súa intención de seguir impulsando o futevolei na comarca: “temos moita ilusión por promocionar este deporte na zona para crear unha masa social e practicalo todos xuntos”. Tamén agradeceu o apoio do Concello de Ribeira na organización do evento.
