É máis ca seguro que, dentro dun millón de anos, a Terra estará recuperada; pero non o necesario para a nosa ambición. Porque a Natureza fala, máis nós non a escoitamos.
Si, este 22 de abril celebrouse en todo o mundo o Día Internacional da Terra Nai coa intención de relembrarmos a importancia do noso planeta como a casa común de todos os seres que a habitamos.
O tamén denominado Día da Terra ten coma obxectivo fundamental chegar a un equilibrio entre a viabilidade e a saúde medioambiental e das necesidades sociais e económicas da nova xeración e as futuras.
O primeiro Día da Terra conmemorouse no ano 1970 co obxectivo de realizar unha gran mobilización que permitise visibilizar o movemento medioambiental, chegando aos 20 millóns de persoas as que se manifestaron esixindo respecto para o medio ambiente, un fito que contribuíu a asentar esta data do 22 de abril como o Día Internacional da Terra Nai.
En base ao éxito da citada manifestación, a administración estadounidense creou a Axencia para a protección do medio ambiente cuxos obxectivos son, fundamentalmente, a conservación das especies en perigo de extinción, a contribución á potabilización da auga e a limpeza do aire. Dous anos despois dese primeiro paso celebrouse o primeiro cumio da Terra en Estocolmo, un cimeiro que sentou as bases do movemento ecoloxista a nivel político,
A día de hoxe, ata mil millóns de persoas dun cento de países participan nesa celebración. Pero a njvel de medio ambiente o panorama non mellora. E no que atinxe a Galicia, as expectativas de futuro nin moito menos melloran se nos baseamos na planificación da eólica marítima e terrestre, a minaría ou a instalación en Palas de Rei da macrocelulosa de Altri, entre outros supostos atentados contra o territorio da comunidade autónoma galega.
Con este futuro máis ou menos inmediato que pon en perigo amplas zonas marítimas, humedais, rías, producións marisqueiras e pesqueiras coma as da ría de Arousa e o bordo litoral onde faenan as frotas de bajxura, está Galicia certamente en condicións de celebrar ese internacional Día da Terra Nai?.
Pouco futuro queda para esas celebracións: non se albiscan motivos para as mesmas, agás que se convoquen pensando en reivindicar o perdido ou o que xa non temos, aferrándonos ao dito de que insultamos á Terra Nai e esta ten para nós galanos como as flores que emerxen cada día.
Talvez teñamos que lle dar unha volta a estes conceptos. Aínda hai tempo para corrixírmonos.
