ULA Libraría Social, con sede na Serra de Outes, vai acoller este venres 25 de abril a presentación do libro Dolores compartidos (Retazos de historias para colectivizar el malestar), editado por Virus e Kaótica Libros. Será ás 19.00 horas deste venres, no local da ULA no 11 da rúa da Capela, na Serra.
Intervirán Itxi Guerra, O Rabelo e Ana M. Amigo Ventureira. Segundo adiantan, “Dolores compartidos non é un libro é un interruptor, unha suma de interruptores curtocircuitados, moitas veces socialmente rotos, que se conectan (ou non) entre si a través de berros, coidados, bágoas e algunha que outra lapa…. Unha especie de interruptor conxunto, híbrido e mutante, unha rede de interruptores, destes que premes e de súpeto a cadeira electrocútate o cu…. Un interruptor que xoga con esa dor, unha dor que pode converterse en amábel ou incluso pracenteira en función da situación, ou que pode rabuñarte por dentro sen previo aviso”.
