Coa chegada do Día Internacional do Libro, paréceme un bo momento para
reflexionar sobre a capacidade lectora e de comprensión dos nenos e nenas
galegos. Aínda que en Galicia temos programas como “Ler Conta Moito”, que
pretenden achegar a nenos e nenas ós libros, moitas persoas seguen considerando
a lectura como algo que se impón, máis que como unha actividade amena.
A lectura non só mellora o vocabulario ou a ortografía; tamén abre a mente,
esperta a imaxinación e ensínanos a poñernos na pel dos demais, desenvolvendo a
capacidade da empatía. Por iso é preocupante que o hábito lector non estea tan
arraigado como debería a idades temperás.
Non abonda con fomentar a lectura dende a escola. As institucións, os medios de
comunicación e as familias teñen moito que aportar para que os libros sexan parte
natural da infancia e da mocidade, sen que sexa visto como unha obriga.
Aproveitemos o Día Internacional do Libro para lembrar que, se queremos unha
Galicia con máis persoas libres, creativas e críticas, hai que inculcar a afección pola
lectura dende a infancia. Deste xeito crearemos un futuro un pouco mellor.
Victor Manuel Serén Cañás, dende Carballo
