O programa formativo da USC para persoas maiores doutros concellos diferentes a Santiago, o programa Camiños de Coñecemento e Experiencia, regresa en xuño ao concello de Padrón para ofrecerlles formación universitaria á poboación sénior local. Esta iniciativa inclúe tres seminarios temáticos de dúas sesións cada un, que se desenvolverán entre o 2 e o 10 de xuño, de catro e media a seis da tarde. A matrícula é gratuíta e pode realizarse no Centro Social de Padrón, en horario de 9.00 a 14.00 horas.
A edición deste ano arrinca os días 2 e 3 de xuño cun seminario sobre Participación social e comunitaria, para que?, impartido por Iván García, profesor colaborador do Programa Universitario de Maiores da USC, quen abordará o papel da cidadanía maior na construción de comunidades activas e cohesionadas.
Nos días 4 e 5, o foco estará no patrimonio fluvial co seminario Muíños e pontes no río Ulla, a cargo de Henrique Neira Pereira. A proposta convida a unha reflexión sobre a historia e importancia destas infraestruturas tradicionais na vida e na economía da contorna.
A terceira proposta formativa terá lugar os días 9 e 10 de xuño. Baixo o título Historia da fotografía: unha viaxe desde a cámara escura ata a era dixital, a investigadora Katia Cino Rouco explorará a evolución da fotografía desde os seus inicios ata a actualidade.
Camiños de coñecemento e experiencia. Proxecto de democratización do coñecemento fai parte do Programa Universitario de Maiores IV Ciclo da Universidade de Santiago de Compostela, organizado coa colaboración da Xunta de Galicia e da Deputación da Coruña. Na edición de 2025 participan, ademais de Padrón, os concellos de Arzúa, Porto do Son, Muros, Noia, O Pino, Ordes, Outes, A Pobra do Caramiñal, Rianxo, Ribeira, Teo e Vedra.
