Eran as 13:30 horas cando o 112 Galicia foi informado do suceso, a través dos membros do GES de Noia: unha persoa caera á ría desde uns catro metros de altura, nunha zona de lama entre os diques de San Lázaro e Cadarso, e precisaba atención sanitaria.
Os xestores do Centro Integrado de Atención ás Emerxencias solicitaron a intervención de Urxencias Sanitarias de Galicia-061, do GES de Noia, da Garda Civil e da Policía Local. Tamén se informou a Salvamento Marítimo, ao Servizo de Gardacostas de Galicia e aos voluntarios de Protección Civil do municipio.
Así, o GES encargouse das tarefas de rescate, tralo que a persoa implicada sería evacuada en ambulancia ao Complexo Hospitalario Universitario de Santiago. A caída provocoulle lesións nas costas e na cabeza.
