Comezou finalmente a conta atrás para a celebración, o vindeiro xoves 1 de maio, da tradicional Xuntanza de Confraternidade que organiza o Concello de Porto do Son co obxectivo de honrar as persoas maiores do municipio. A xornada dará comezo ás 12:00 horas cunha misa na igrexa de San Vicente de Noal, que contará coa participación do Coro Parroquial de Porto do Son. Máis tarde, ás 14:00 horas, os asistentes poderán desfrutar dun xantar na carpa instalada no xardín da zona portuaria.
A participación no xantar será gratuíta, pero será necesario confirmar asistencia de maneira previa. As inscricións poderán realizarse de forma presencial na Área de Benestar Social do Concello até o venres 25 de abril, presentando o DNI orixinal no momento da inscrición. O Concello tamén habilitará un servizo de autobuses para facilitar o acceso ao evento.
Para máis información, as persoas interesadas poden contactar co departamento correspondente chamando ao teléfono 981 86 74 14, en horario de 9:00 a 13:00 horas.
O alcalde, Luís Oujo, expresou a súa satisfacción por poder presentar esta nova edición da Xuntanza de Confraternidade, un evento con gran tradición no municipio e que serve como espazo de encontro para os nosos maiores.
