O Concello de Porto do Son vén de rematar as obras de instalación do equipamento fotovoltaico de autoconsumo no CEIP Santa Irene, un proxecto que ten a finalidade de “reducir o gasto enerxético e fomentar a sustentabilidade”.
A nova instalación, composta por 20 módulos de paneis solares de 550Wp por unidade, conta cun investimento total de 15.730 euros.
Deste xeito, para materializar o proxecto o Concello de Porto do Son recibiu a través do Instituto Enerxético de Galicia (INEGA) unha subvención para financiar o 60% da totalidade, sendo o 40% restante achega a través de fondos municipais.
O alcalde, Luis Oujo, indicou “que este é outro exemplo máis da firme aposta do Concello de Porto do Son pola eficiencia enerxética e polo fomento das enerxías limpas e renovábeis”. O rexedor engadiu que “con esta nova instalación imos producir o suficiente volume de enerxía para abastecer ao colexio, reducindo de xeito considerábel o gasto enerxético municipal, co seu consecuente aforro nas arcas municipais”.
