O Laboratorio Ecosocial do Barbanza organiza este domingo 20 de abril unha xornada de identificación participativa de biodiversidade coordinada por Fundación Montescola coa colaboración da CMVMC do Araño: un bioblitz. O punto de encontro será o Campo da Festa do Araño, desde onde partirá a actividade, ás 10:30 da mañá. Está aberta a todos os públicos con inscrición previa até o venres 18 de abril.
A actividade está coordinada por Fundación Montescola coa colaboración da Comunidade do Monte Veciñal en Man Común do Araño, que apoia esta iniciativa de valorización e coñecemento do seu patrimonio natural.
Para quen non o saiba, un bioblitz é unha unha xornada de identificación participativa de biodiversidade na que persoas expertas e veciñanza colaboran para rexistrar o maior número posible de especies presentes nun espazo natural nun tempo limitado. A actividade contará cun grupo multidisciplinar de expertas en botánica, entomoloxía, ornitoloxía e micoloxía. Está aberta a todos os públicos, sen necesidade de coñecementos previos, e pretende achegar a biodiversidade local á cidadanía. As persoas interesadas poden inscribirse até o venres 18 de abril, enviando un correo electrónico a info@montescola.org.
Segundo lembran dende o Laboratorio Ecosocial, o monte do Araño “atesoura zonas de moi alto valor ambiental, aínda pouco coñecidas, como o curso medio e alto do río Te e o seu val, onde se atopa o Pozo Bastón, ou o val que forma o rego do Muíño do Conde, espazos de gran interese ecolóxico e paisaxístico”.
O Laboratorio está financiado con fondos europeos grazas ao apoio da Fundación Biodiversidad do Ministerio para la Transición Ecológica y el Reto Demográfico (MITECO), no marco do Plan de Recuperación, Transformación e Resiliencia (PRTR), financiado pola Unión Europea – NextGenerationEU. A coordinación do proxecto do Laboratorio está a cargo da Fundación RIA.
