A subdelegada do Goberno na Coruña, María Rivas, deu a coñecer os días pasados que o MITECO (Ministerio para a Transición Ecolóxico e o Reto Demográfico) vai destinar máis de 2,5 millóns de euros na protección de 9 espazos dunares da provincia da Coruña, incluídos os sistemas ambientais costeiros de Xuño (Porto do Son) e Carnota. Fíxoo durante unha visita á praia de Morouzos, en Ortigueira, onde supervisou o avance dos traballos que executa o Goberno nesta localidade.
En concreto, a subdelegada comprobou os traballos de delimitación das zonas de tránsito o que permitirá evitar o acceso peonil ao areal polas zonas de duna e reverter así o deterioro da cuberta vexetal. “Estas obras forman parte dunha actuación do Ministerio para loitar contra a erosión na costa da Coruña e, ao mesmo tempo, aumentar a súa resiliencia ante os efectos do cambio climático”, apuntou a subdelegada, que incidiu na importancia de conservar os ecosistemas “para poder seguir gozando de areais tan fermosos como este de Morouzos”.
Ademais de en o de Morouzos, o plan contempla como dixemos actuacións nos ecosistemas dunares de Vilarrube (Valdoviño), San Xurxo (Ferrol), Baldaio (Carballo), Soesto e Traba (Laxe), Nemiña (Muxía), Xuño (Porto do Son) e Carnota, o que permitirá restaurar 33,9 Km de áreas e ecosistemas degradados da costa da Coruña. O orzamento global ascende a 2.558.652,90 euros e prevese que todas as obras estean executadas ao longo de 2025.
