O Concello de Muros fixo balance do traballo despregado na actual lexislatura en materia de saneamento nos núcleos do termo municipal, unha liña de traballo suma investimentos por case 1,5 millóns de euros e que, segundo se fai saber no reconto de logros, chegou ás 80 novas vivendas do concello conectadas á rede de saneamento municipal.
“Cando chegamos ao goberno, no verán do 2023, xa sabíamos que tiñamos moito traballo por diante en materia de saneamento, unha prioridade para nós”, explicou a alcaldesa, María Lago, engadindo que durante os primeiros meses do mandato realizáronse actuacións de mantemento na rede en todas as parroquias, á vez que se planificaron obras para levar o saneamento a zonas que carecían do servizo en Serres, Abelleira, Esteiro e Tal.
A día de hoxe, o Concello executou obras en Creo, Trión, no Vilar (Abelleira) e Louro. A isto engádense os traballos realizados na Gardiña, na Rola e en Serres, ao que se suma “a licitación da baixante da marxe esquerda da estrada de Serres”, segundo explicou a concelleira de Obras, Laura Rivadeneira, engadindo que tamén foi adxudicado “o arranxo dunha parte importante da rúa Real, que inclúe as melloras no saneamento, así como as melloras de saneamento en Solleiros”.
Atópase tamén en fase de licitación unha actuación na Ribeira do Maio, que inclúe a substitución da rede de saneamento. O Concello tamén engadiu que nunha recente reunión con Augas de Galicia, a Administración local solicitou financiamento para outros proxectos de saneamento en Bornalle (Abelleira); Insuela (Esteiro), e na AC-550 (tramo Valdexeria-Laxeiras).
