O Concello de Boiro recibiu da Deputación da Coruña unha subvención por importe de 16.000 euros para financiar os gastos de persoal técnico para a atención a museos e centros museísticos durante o ano 2025. Esta axuda vaise destinar ao servizo prestado no Centro Arqueolóxico do Barbanza e Pazo de Goiáns.
O obxecto desta subvención é o financiamento de persoal técnico para a coordinación e atención a museos e centros de interpretación durante o ano 2025, en particular o Centro Arqueolóxico do Barbanza e o Pazo de Goiáns que aumentan de xeito exponencial os seus visitantes durante a época estival.
O Centro Arqueolóxico do Barbanza está cualificado como colección visitábel de contido arqueolóxico e a zona arqueolóxica de Neixón está declarada Ben de Interese Cultural (BIC). O Pazo de Goiáns e a súa contorna conta cun gran interese patrimonial e tamén cultural, espazo no que se desenvolven ao longo do ano numerosas visitas e actividades para o público xeral.
Mediante esta subvención vanse sufragar os custes do persoal que desenvolve a atención ao público e visitas guiadas nos dous centros, así como a coordinación de actividades e exposicións que se desenvolven nos espazos.
