A conselleira do Medio Rural, María José Gómez, visitou esta mañá as instalacións da Sociedade Agrícola de Transformación A Pementeira, situadas no concello coruñés de Padrón. Alí, puxo en valor o bo facer desta entidade, consolidada como unha cooperativa de referencia na produción, envasado e comercialización do Pemento de Herbón.
María José Gómez louvou o labor desenvolvido polas socias desta entidade, conformada maioritariamente por mulleres, que poñen de relevo o “papel protagonista” que teñen as mulleres no medio rural a todos os niveis. Salientou que A Pementeira mestura tradición con mecanismos actuais e novidosos na súa produción, amparada pola Denominación de Orixe Protexida (DOP) Pemento de Herbón, que no ano 2024 acadou unha produción de preto de 72.200 quilogramos e un valor económico estimado de 290.000 euros.
A conselleira recoñeceu a decidida aposta de A Pementeira pola calidade e a transformación como ferramenta para acadar valor engadido. Este compromiso materialízase a través das súas elaboracións, entre as que destacan as marmeladas, que contan co distintivo de Artesanía Alimentaria.
Esta aposta, asegurou Gómez, é compartida polo Goberno autonómico. Neste sentido, a Consellería do Medio Rural fomentará a activación dunha rede de centros de innovación agroalimentaria no medio rural, dedicada a asesorar aquelas iniciativas empresariais que queiran transformar os seus produtos para multiplicar así o seu valor engadido. A titular deste departamento subliñou que o compromiso co I+D+i e o reforzo da actividade dos Centros de Formación e Experimentación Agraria serán “clave” para outorgarlle aos produtos galegos o recoñecemento axeitado.
Seguindo esta liña, lembrou que a Xunta ten entre as súas prioridades a promoción e posta en valor dos produtos agroalimentarios de calidade que se producen na comunidade. Galicia conta con ata 36 distintivos de calidade, unha das comunidades autónomas con máis denominacións de orixe e indicacións xeográficas protexidas. Os selos de calidade levan a cabo un importante traballo como axentes dinamizadores da economía galega e contribúen de xeito significativo á conservación do territorio, da paisaxe e da poboación no rural.
