O ministro de Agricultura, Pesca e Alimentación, Luis Planas, subliñou este luns o compromiso do Goberno co sector cooperativo a través do pulo da integración asociativa, para que estas empresas do medio rural gañen en dimensión, rendibilidade e competitividade.
O ministerio aposta, de feito, pola integración de cooperativas e outras entidades asociativas co recoñecemento das Entidades Asociativas Prioritarias das que actualmente hai 19 recoñecidas en España. A primeira convocatoria para o fomento da jntegración de entidades asociativas agroalimentarias supraautonómicas cun orzamento de algo máis de 33 millóns de euros vai realizarse no segundo trimestre deste ano.
O ministro Planas felicitou aos representantes destas cooperativas polo seu IX Congreso Nacional e repasaron xuntos o estado da situación do comercio internacional ante a imposición unilateral de aranceis por parte de Estados Unidos e trasladou o apoio do goberno ao conxunto do sector agrario, en particular a economía social cooperativa, así como a defensa dun comercio internacional baseado en reglas.
España é o primeiro país da Unión Europea en aprobar, como diciamos, un plan de resposta e relanzamento comercial por valor de 14.320 millóns de euros para defender os produtos e sectores afectados pola actual coxuntura internacional.
Planas é decidido defensor de manter, ampliar e diversificar mercados e pon como exemplo o acordo con Mercosur que, dixo o ministro, beneficiará a produtos tan relevantes coma o viño, o aceite de oliva ou outros produtos transformados españois coa apertura a un mercado de 268 millóns de consumidores.
No actual contexto xeopolítico e climático, o sector primario debe ser quen, dixo Planas, de liderar o camiño cara uns sistemas alimentarios sostibles que acaden manter o vínculo das poboacións en medios rurais e costeiros.
