Moitos cidadáns continuamos pensando que a Democracia e o Estado de Dereito hai que defendelos cada día, fronte aos innumerables inimigos e contrarios á Xustiza Social e á Igualdade real entre españois.
Neste sentido, e como galego, sinto vergoña por que o anterior rei de España, o emérito Juan Carlos I, fuxido nunha ditadura asiática por presunta malversación, corrupción e branqueo de capitais, sexa recibido institucionalmente por parte de responsables da Xunta de Galicia e da alcaldía de Sanxenxo. É moi miserable, como tamén o é o que pasou na Comunidade Valenciana, con Mazón, con máis de douscentos mortos pola DINA ás súas costas, por presunta neglixencia e o que aconteceu na Comunidad de Madrid, cos chamados protocolos da morte nas Residencias, con miles de falecidos, sen asistencia médica e abandonados á súa sorte.
Casualmente, en todos estes casos os responsables desas situacións son dirixentes da dereita política española que xustifican o inxustificable, por manterse no poder a calquera prezo, aínda que sexa á conta da vida de persoas inocentes e indefensas.
Juan Carlos I, é un presunto delincuente e como tal non tería que ser recibido, de maneira institucional, por ningunha autoridade democrática. Outra cuestión é que o acollan uns poucos empresarios particulares ou amigos palmeiros. Un pouco de vergoña, por favor. Se fose un desgraciado indixente ou un ocupa nun edificio, propiedade dun fondo voitre, estaría en prisión. Demasiados hipócritas e moitos vividores, “viva o viño…”, e sigamos denigrando a Democracia, con estes exemplos.
