Os patróns e capitáns de barcos xa non teñen excusa para fondearen en zonas protexidas do Mar Mediterráneo.
O pasado mércores, un patrón profesional foi condeado en apelación polo xulgado de Marsella (Francia) por ter fondeado nunha zona protexida na que hai pradarías de posidonia, a máis de se lle prohibir fondear embarcacións de máis de 20 metros de eslora.
A multa foi de 5.000 euros, 3.000 deles están suspendidos, que o patrón debe pagar polos danos á flora marítima ao bordo de augas francesas, monegascas e italianas.
Recoñecida polo seu papel na osixenación e estabilización do fondo mariño, a posidonia é unha especie mariña protexida obxecto dun extenso programa de observación.
Non foi esta a primeira vez que os xuíces recoñecen un dano ecolóxico relacionado con danos nas pradarías de posidonia. O xulgado marítimo xa confirmou o pasado mes de novembro o dano ecolóxico a nivel civil e condeado aos capitáns de dous iates a pagar senllas indemnizacións de 86.537 euros (ao “Despegue”) e 23.423 euros (ao “Meu Falcón”) en concepto de compensacións pola perda de valor ecosistémico por teren fondeado en zonas prohibidas por decretos do Prefecto Marítimo do Mediterráneo. O jmporte destas sancións foi destinado a operacións de restauración ecolóxica das pradarías de posidonia. Tamén pagaron 5.000 e 4.000 euros, respectivamente, por danos morais ás partes civís, unha decisión que xa sentou precedente.
As pradarías de posidonia son unha especie endémica do mar Mediterráneo que non está presente en ningún outro mar do mundo. Podemos atopala entre a cota superficial, ata os 30-40 metros de profundidade en función do transparente das augas.
Vai unha semana, a Plataforma Augas Limpas e o club de mergullo Ons levaron a cabo un mergullo na contorna da praia de Arneles, na ribeira do Hío (ría de Aldán) que provocou unha inmensa decepción: os fondos mariños dunha das zonas máis frecuentadas e fermosas desta ría están ateigados de lixo e, aínda máis lamentable, sen pegada da alga zosteira, fundamental para a conservación da fauna mariña e polo seu aporte de osíxeno. Esta é unha evidencia do dano que soporta esta ría polo fondeo incontrolado na mesma de embarcacións de todo tipo. Máis Galicia debe ser “sitio distinto”: aquí non se sanciona a ninguén de ningures polo fondeo indebido de embarcacións en prácticamente todo o litoral, dende xa responsabilidade da comunidade autónoma. Ben pode comprobarse nas rías de Arousa e Muros-Noia, por non citar a todas elas, atlas ou baixas. E será porque un Prefecto Marítimo do Mediterráneo ten máis responsabilidade ca un conselleiro do Mar?.
